Davao City – Nagpabiling labad sa ulo sa mga opisyal sa Barangay 76-A Bocana ang mga kabatan-onan nga gamugna og kaguliyang panahon sa kagabhion diin nahasol na og maayo ang mga residente tungod sa ilang riot.
Giangkon ni Kapitan Bogart Trajera nga nalisdan gayod sila sa pagpitol sa mga batan-on taliwala sa istrikto nga curfew apan inig wala nay magroving nga mga tanod, mubalik na pod og tambay ug mag-riot pa ang uban.
Segun ni Trajera nga sa primero, mupatoo pa ang mga batan-on apan inig labay og pila ka kagabii subli na pod mubalik og tambay ug maglatagaw panahon sa kagabhion.
Matud ni Trajera nga ang usa pa sa nakahatag kanila og suliran mao ang mga internetan nga nagpalibot sa ilang barangay kay gihimong pundohanan sa mga batan-on diyes oras sa gabii.
Busa naglibog na ang kapitan sa angay nilang buhaton aron makumbinser ang kabatan-onan nga mohunong na sa pagtambay ug pagmugna og kasamok sama sa riot pagdangat sa lawom sa kagabhion.
Sumala ni Trajera nga ila na usab gipatawag ang mga ginikanan aron pasidan-an nga mag-atubang sila og asunto kung mapakyas sila og pagpitol ug pagdisiplina sa ilang mga anak.
Ang usa sa gihimong istratehiya sa barangay mao ang pagpahigayon og counseling aron maymayan ug pasabton ang mga ginikanan sa ilang responsibilidad sa ilang mga anak apan wala gihapon musalir.
Gipaabot ni Trajera nga mahimo nang hingpit nga balaud ang pag-ubos sa edad sa mga bata nga puwede na silang patubagon sa salaud nga ilang makumiter, di sama karon buhian ra sila sa mga pulis.
RadyoMaN Joel Viray
