Youth leaders gi-edukar sa recruitment strategy sa CPP-NPA-NDF

Davao City – Sa tingoha nga dili na makalingla ang Teroristang CPP-NPA-NDF sa sektor sa mga kabataan partikular na sa hut-ong sa mga estudyante, kasamtangang gilusad sa 10th Infantry “Agila” Division- Civil Military Operation Batallion ang “Youth Summit” karong adlawa.

Suma ni CMO-Support Community Program Lt. Mark Lester Llono nga usa ka simultaneous ang kalihokan sa “Youth Summit” sa mga tulonghaan sa Governor Vicente Duterte National High School ug Carlos P. Garcia National Highschool kansang gipilan sa 300 ka mga youth leaders gikan mismo sa maong mga eskwelahan.

Segun ni Lt. Llono, ang kanhi nga mga lideres sa militanteng pundok ug tag-as nga mga opisyal sa Teroristang CPP-NPA-NDF nga silang Diolito Diarog ug Ariane Jane Ramos kon Alyas Marikit ang magsilbing lecturers sa “Youth Summit” nga dunay tema nga “Protecting the Youth, Saving Our Future”.

Nasayran nga paborito rekruton sa Teroristang CPP-NPA-NDF ang hut-ong sa kabatan-onan sanglit ang ilang sektor dali ra kaayo tamnan og dautan nga kasayoran ang ilang alinpatakan, busa pinaagi niining training and workshop mahibaloan sa mga partisipante ang istratihiya sa recruitment sa mga terorista ug Kumonista lakip na ang galamay nga mga militante.

Ang Youth Summit Activity kabahin kini sa padayon sa 10ID-CMO Batallion kontra insurhensiya ug niini wala na’y kahigayonan ang teroristang CPP-NPA-NDF nga makapalig-on pag-usab sa ilang organisasyon ug sa ingon mapreserba ang pagka-gawasnon na sa rehiyon onse gikan sa presensiya sa teroristang CPP-NPA-NDF.

RadyoMaN Joel Viray