Na fin de este mez de Setyembre ta man target el contractor del Zamboanga City Water District (ZCWD) para cumpleta el pipelaying project aqui na sentro del fueblo.
Este el aseguramiento del ZCWD amediante el lingasa del govierno local por el mga ta man balandra mga road blocks del ahensya na mga camino aqui mismo na sentro del fueblo que ta causa fesao trafico y peligroso con el mga vivientes que ta pasa na lugar.
Na entrevista del RMN Zamboanga, el portavos del ZCWD Edgar Lorenzo Baños ya habla cay el ESTI quien amo contratao na pipelaying del Primewater Corporation, ta finaliza ya aura el mga sementada y ponida de aspalto con el mga ya grevata sila portion del camino na guardia nacional, y solamente el ponida ya lang del un grande box culvert na vicinidad del bumbero local edeficio amo sila ta sementa.
Si Baños ya habla cay de apuro aura el trabajo ta hace el contractor para hinde mas alarga el sufrimiento del public y mga motorista que ta pasa na mentiona locaccion.
De mas temprano si ta acorda, el mismo alcalde Beng Climaco ta man lingasa aserca este proyekto porcausa cay hay afecta este con el mga actividades del Zamboanga Hermosa Festival si hinde pa fuede utiliza conestos mga camino que ya grevata el ZCWD. El camino na Guardia Nacional amo el lugar donde ta conduci cada Octubre el traditional street dance enconneccion del fiesta de La Virgen del Pilar.– *Bhong Simbajon/RMN News*
