Davao City – Walay ni usa sa mga eksperto sa kinaiyahan makasulti kun duna ba o walay madisgrasya nga kinabuhi sa pagsulod ni bagyong Vinta sa pipila ka lugar sa Mindanao partikular sa rehiyon onse.
Bisan si Kinaiyahan Foundation focal person Betty Cabasares dili makasulti kun duna ba’y makalikay sa pagkusokuso ni bagyong Vinta hilabi na kun magmagahi ang mga tawo sa pagbalhin ug pagkuyog sa evacuation center.
Mabutang nga walay pulos ang paningkamot sa mga ahensiya sa gobyerno kun mismo ang mga tawo dili makig-alayon ug maminaw kanila.
Walay kwestiyon ang koordinasyon ug joint effort sa mga ahensiya karon kay makita man ang ilang hugot nga pagpangandam apan masayang kini tanan kun ang mga tawo dili makig-kooperar kanila.
Hayan nagkat-on na ang mga taga-rehiyon onse tungod sa bagyong Pablo niadtong 2012, apan puwede gihapon masubli ang delobyo kun magpasagad sa bagyong vinta karon.
Ang dili paggamit sa sakto nga kahibalo kontra kalamidad ug ang sobra ka kumpiyansa puwede mag-butang sa kakuyaw sa kinabuhi niining pagkusokuso ni bagyong vinta sa atong rehiyon.
Busa awhag sa Focal Person mao nga sundon ang ipatuman nga pre-emptive evacuation samtang dili pa ulahi ang tanan ug samtang duna pa’y kahigayonan nga makalikay sa paghampak sa bagyo.
Tambag pa ni Kinaiyahan Foundation focal person Betty Cabasares alang sa tanan mao nga mag-igmat ug magbinantayon ug andamon ang mga gikinahanglan nga puwede magamit panahon sa kalamidad.
Mga kasama, ayaw pagduha-duha sa pagsangpit sa Dios ug mangaluyupo nga kita iyang luwason gikan sa katumpawakan sa kalamidad sanglit walay maayong laki makalingkawas sa bangis sa bagyo.
RadyoMaN Joel Viray
