Davao city – Giwagtang sa 10th Infantry Division Philippine Army ang kabalaka sa pipila sa posibleng abuso sa martial law extension sa Mindanao.
Sa interview sa DXDC RMN Davao kang 10th Infantry Division Commander Major General Noel Clemente, sumala niya nga walay angay kahadlokan ang publiko sa balaod militar nga gilugway sa Mindanao kutob Disyembre 31, 2018.
Matud ni Clement nga wala siya’y tugotan sa iyang mga ginsakpan nga mangabuso panahon sa balaod militar hilabi na nga nabalik na ang maayo nga imahe sa militar tungod sa dakong pagsalig sa katawhan karon.
Gipasalig pa sa Heneral nga dili niya konsentihon ang iyang mga sakop nga makakumitar og pangabuso sa balaod militar.
Gani kamatooran niini, sukad giimplementar ang martial law sa Mindanao hangtud karon wala pay ni usa ka reklamo nga biktima sa abuso sa sundalo nga miabot sa buhatan sa Heneral.
Giluwat ang pamahayag ni Clement isip pag-alkontra sa propaganda sa mga militante nga mas mugrabe pa ang paglapas sa tawhanong katungod gumikan sa pagluway sa balaod militar sa Mindanao.
Migawas nga 240 ka magbabalaod mipabor sa one year extension sa martial law ug samtang nga 27 ang mikontra ug zero abstain atol sa gipahigayon nga Joint Session sa kongreso karong adlawa.
RadyoMaN Joel Viray
