Ang kapolisan sa Zamboanga del Norte Police Provincial Office (ZNPPO) sa pagpangulo ni Provinvial Director Police Senior Supt. Raul Tacaca milugway usab ug hinabang alang sa mga biktima sa bagyong Vinta nga mihapak dinhi sa probinsya kaniadtong Desyembre sa miaging tuig.
Kini ang nasayran gikan ni Police Chief Inspector Charisse Yabo, ang hepe sa Police Community Relations (PCR) sa ZNPPO.
Sa barangay Cocob, Panganuran ug Canupong sa lungsod sa Gutalac, adunay 179 ka pamilya ang nahatagan sa food packs ug used clothing gikan sa maong buhatan.
Samtang sa Barangay Liguac, West Poblacion, East Pobalcion, Mucas, Lanawan ug Ramon Magsaysay nakadawat usab ang 350 ka pamilya sa susamang hinabang gikan sa ZNPPO nga gipangunayan pagtunol mismo ni Police Senior Supt. Tacaca.
Dugang pa ni Police Chief Inspector Yabo nga gikatakda nga molugway usab sila sa maong ayuda ngadto sa nabiktima sa bagyong Vinta didto sa Siocon, Sibuco, Sirawai ug Baliguian.
Nasayran nga grabeng kadaut ang gipabalin sa bagyong Vinta dinhi sa probinsya ug mikalas ug daghanang kinabuhi. (M.L)
