𝗣𝗔𝗚𝗞𝗔𝗠𝗔𝗧𝗔𝗬 𝗡𝗚 𝗜𝗦𝗔𝗡𝗚 𝗘𝗦𝗧𝗨𝗗𝗬𝗔𝗡𝗧𝗘 𝗦𝗔 𝗟𝗬𝗢𝗡, 𝗨𝗠𝗔𝗡𝗜 𝗡𝗚 𝗥𝗘𝗔𝗞𝗦𝗬𝗢𝗡 𝗠𝗨𝗟𝗔 𝗦𝗔 𝗣𝗨𝗕𝗟𝗜𝗞𝗢

‎Cauayan City – Umani ng matinding reaksyon sa France ang pagkamatay ng 23-anyos na estudyanteng si Quentin Deranque matapos siyang bugbugin sa Lyon.

‎Dalawang araw matapos ang insidente, pumanaw ang biktima dahil sa matinding pinsala sa ulo at utak.

‎Kinumpirma ni prosecutor Thierry Dran na isinailalim na sa imbestigasyon bilang kasong pagpatay ang nangyari.

‎Ayon sa mga awtoridad, sinipa at sinuntok si Deranque ng hindi bababa sa anim na katao kasunod ng komprontasyon ng dalawang grupo.

‎Bago mangyari ang insidente, sumuporta si Deranque sa kilos-protesta ng hard-right feminist collective na Némésis laban sa pagbisita ng isang makakaliwang politiko sa lungsod.

‎Itinuro ng mga opisyal ng administrasyon ni Pangulong Emmanuel Macron ang mga militanteng “far-left” bilang responsable sa krimen.

‎Sinabi ni Interior Minister Laurent Nuñez na malinaw umanong gawa ito ng kaliwang grupo at inilarawan ang pangyayari bilang “mob killing.”

‎Samantala, iginiit ni Jean-Luc Mélenchon na walang kinalaman ang kanyang partido sa insidente at tinawag na paninirang-puri ang mga akusasyon.

‎Nagpahayag din siya ng pakikiramay sa pamilya ng biktima at muling binigyang-diin ang pagtutol sa anumang uri ng karahasan habang nagpapatuloy ang imbestigasyon.
————————————–

‎Para sa update at iba pang mga balita, bisitahin ang aming facebook page 98.5 iFM Cauayan at ang aming website, www.rmn.ph/985ifmcauayan.

‎#985ifmcauayan
‎#idol
‎#numberone
‎#ifmnewscauayan