𝗣𝗔𝗚𝗧𝗨𝗧𝗢𝗟 𝗦𝗔 𝗣𝗔𝗥𝗨𝗦𝗔𝗡𝗚 𝗕𝗜𝗧𝗔𝗬 𝗡𝗚 𝗜𝗦𝗔𝗡𝗚 𝗜𝗥𝗔𝗡𝗜𝗔𝗡 𝗔𝗖𝗧𝗜𝗩𝗜𝗦𝗧, 𝗜𝗣𝗜𝗡𝗔𝗡𝗔𝗪𝗔𝗚𝗔𝗡 𝗡𝗚 𝗨𝗡𝗜𝗧𝗘𝗗 𝗡𝗔𝗧𝗜𝗢𝗡𝗦

‎Cauayan City – Nanawagan ang mga United Nation experts sa pamahalaan ng Iran na huwag ituloy ang pagbitay kay Zahra Tabari, isang 67-anyos na engineer at women’s rights activist.

‎Inaresto siya noong Abril at inakusahan ng pakikipag-ugnayan sa isang ipinagbabawal na grupong oposisyon.

‎Noong Oktubre, hinatulan si Tabari ng “armed rebellion” ng isang Revolutionary Court matapos ang maikling paglilitis na tumagal lamang ng ilang minuto. Ayon sa kanyang pamilya, ibinatay ang hatol sa limitado at kuwestiyunableng ebidensiya, habang nanatiling tahimik ang mga awtoridad ng Iran sa usapin.

‎Ayon sa mga UN Human Rights Council’s special rapporteurs on human rights in Iran, violence against women and arbitrary executions, nilabag ang karapatan ni Tabari sa wastong proseso ng batas, kabilang ang pag-aresto nang walang warrant, pagkakait ng sariling abogado, at agarang pagpapataw ng sentensiyang kamatayan.

‎Giit nila, ang ganitong mga paglabag ay salungat sa internasyonal na batas sa karapatang pantao.

‎Samantala, lumagda rin sa isang public appeal ang mahigit 400 prominent women kabilang ang Nobel laureates; dating mga Presidente ng Switzerland at Ecuador; at dating Prime Ministers ng Finland, Peru, Poland, at Ukraine upang hilingin ang agarang pagpapalaya kay Tabari.

‎Ayon sa mga human rights group, patuloy na nangunguna ang Iran sa bilang ng pagbitay sa kababaihan, at ang kaso ni Tabari ay sumasalamin sa lumalalang pagsupil sa mga aktibistang nagtataguyod ng pagkakapantay-pantay ng kasarian.