Nadakpan ang usa ka negosyante ug ang cashier niini human gihimo ang Oplan OLEA (Entrapment Operation Against Selling and Profiteering of Overpriced Isopropyl Alcohol 70% Solution nga gihimo sa CIDG Bukidnon, DTI Bukdnon, PHO, Task Force COVID ug Malaybalay City PNP niadtong Lunes, Abril 20.
Gisikop kini tungod matud pa sa kasupakan sa Sec. 5 of R.A. 7581 (Price Act), R.A. 7394 (Consumer Act) ug Sec. 6(c) sa R.A. 11469 (Bayanihan to Heal as One Act).
Nag-ugat ang mao nga operasyon human nakadawat ug impormasyon ang CIDG Bukidnon PFU sa gi-ingong overpricing matud pa sa gibaligya nga isopropyl rubbing alcohol sa AK TRADING, nga nahimutang sa Pimentel Street, Brgy 1, Malaybalay City.
Nasayran nga mukabat sa Php 38, 975.00 ang kinatibuk-ang kantidad sa alcohol nga gibaligya niini kumpara sa Php 16, 796.75 lang unta nga kantidad subay sa gitakda nga suggested retail price kon SRP.
