Tinupok ng apoy ang wet market ng Lungsod ng San Fernando sa lalawigan ng La Union.
Base sa nakuhang impormasyon ng IFM News Dagupan sa BFP San Fernando City, nakatanggap ang kanilang tanggapan ng tawag mula sa concerned citizen pasado 1:46 ng madaling araw kahapon nang masunog ang naturang palengke.
Sa naging panayam ng IFM News Dagupan kay Fire Chief Inspector Jun Eland Wanawan ng BFP San Fernando City, naging pahirapan ang pag-apula sa sunog dahil mabilis na kumalat ang apoy gawa aniya ng mga light materials sa loob ng palengke.
Dagdag pa nito, dahil sa mabilis na pagkalat ng apoy ay itinaas sa Task Force Alpha ang alarma ng sunog kung saan aniya ipinatawag na lahat ng mga firetrucks sa lungsod at maging ng pag-augment sa mga karatig bayan para tumulong na rumesponde sa sunog.
Sa datos ng LGU, nasa kabuuang 1, 156 na stall occupants ang apektado at base sa kanilang taya ay nasa mahigit ₱200-milyon capitalization ang halaga ng economic loss sa palengke.
Dahil sa naganap na sunog ay humiling at nagpasa na ng resolusyon ngayon ang alkalde ng lungsod na si City Mayor Hermenegildo Gualberto katuwang CDRRMO na ideklara ang lungsod sa ilalim ng State of Calamity sa tulong din ng Sangguniang Panglusod na siyang magaapruba nito.
Sa ngayon nagpapatuloy pa ang imbestigasyon ng mga awtoridad sa kung ano ang pinagmulan ng sunog. |𝙞𝙛𝙢𝙣𝙚𝙬𝙨
