Nagbigay ng katiyakan ang Chief ng Public Order and Safety Office ng Mangaldan na naisasagawa nila ng maayos ang physical assessment at checking ng kanilang mga Traffic enforcers lalo pa at nito lamang ay dalawa sa mga ito ay sinibak sa pwesto dahil lasing umanong pumasok sa kanilang mga trabaho.
Ayon sa panayam ng IFM News Dagupan kay POSO Mangaldan Chief Gerard Ydia, weekly umano ang kanilang isinasagawang checking at pagpapapunta ng mga enforcers sa infirmary para ma-check kung sila ay physically fit at handa sa kanilang mga ginagampanang trabaho sa gitna ng kakalsadahan.
Nitong nakaraang linggo lamang ay tatlong beses umano silang nagkaroon ng physical check-up para mamonitor ang kalagayan ng kanilang mga kasama sa hanay ng POSO.
Kung hindi rin umano kaya ng isang traffic enforcer ang nararamdaman init sa gitna ng kalsada ay maaari rin naman na sumilong ang mga ito at makapagpahinga dahil hindi naman umano maiiwasan ang tindi ng init ng panahon. |𝙞𝙛𝙢𝙣𝙚𝙬𝙨
