Report ni: Jennifer Palomo Debaja
Isa naman ka masubo nga balita sa Filipino community ang trahedya sa duwa ka Pinoy kagab-i sa Riyadh, Saudi Arabia.
Ginkumpirmar ni Abdulhalim Langco, Assistant to National Unit Officer sang Philippine Embassy sa Riyadh, Saudi Arabia, ang pagkapatay sang isa ka OFW kagab-i sa nagluntad nga pagbun-anay sa pareho nga pinoy.
Ginkilala ang biktima kay Monico Basco Manasala tumandok sang Sasmuan, Pampanga, isa ka subcontract worker sa Rimal Alswahel Company sa Riyadh samtang wala pa ginpangalanan ang suspek.
Sa inisyal nga impormasyon, nagluntad ang pagbaisay sa duwa ka Pinoy tubtob ginbuno sang suspek ang biktima tubtob mapatay kag sang nahimasmasan ang suspek, naglumpat man ini halin sa 3rd floor sa accomodation nga ila gina estaran kag nagapabilin nga ginabulong sa ospital.
Padayon pa ang imbistigasyon sang Saudi Police kag Philippine Embassy sa Riyadh sa gintunaan kag motibo sang krimen.
Maga extend man sang assistance ang Philippine Embassy kag Philippine Overseas Labor Office sa pamilya sang duwa ka Pinoy.
