Patay ang usa ka pulis samtang tulo ang samdan human ang nahitabong pagpang-ambush sa KM 26, Barangay Tikalaag, Talakag, Bukidnon alas 6:40 sa buntag kagahapong adlawa.
Sa interview sa RMN Malaybalay ngadto kang Police Capt. Dominador Orate Jr, ang hepe sa Talakag Municipal Police Station, gibutyag niini nga gi-ambush sa mga New Peoples Army kon NPA ang convoy sa kapulisan nga nagsilbing security escort sa Directorate for Integrated Police Operation for Eastern Mindanao nga naghimo sa Operational Readiness and Performance Audit (ORPA) nga gipangunahan ni PBGEN JOSELITO F SALIDO.
Nasayran nga gikan sa Don Carlos,Bukidnon ang mao nga grupo.
Naila ang namatay nga pulis nga si Police Corporal Rowel Sumaylo samtang samaran sila si Police Staff Sargeant Jerwin Genilla, Police Senior Master Sergeant Giovannie Malinab ug Police Capt. Ramil Gighe kinsa mga miyembro sa 1st Bukidnon Provincial Mobile Force Company.
Luwas usab ang heneral nga si PBGEN Salido, ug mga kaubanan niini human nga nakamaniobra sa pag-ikyas sa ambush paingon sa luwas nga lugar.
Matud ni Cpt. Orate nga hapon na sila nakabiya sa mao nga lugar tungod kay gihimo pa ang clearing sa palibot human nga nakadiskubre silang adunay bomba nga gitanom sa mao nga crime scene.
Gipahayag usab sa hepe nga nakiglambigit daan ang mao nga convoy sa ilang police station tungod kay kabahin na kini sa ilang security plan.
Gibutyag ni Orate nga tulo ka sakyanan ang nagsunod ug nag-una ang patrol car nga gisakyan sa 1st Bukidnon Provincial Mobile Force Company nga maoy gitarget sa ambush.
Wala usab girakrakan ang laing duha ka sakyanan nga nagsunod kung asa didto nasakay ang heneral sa pulis ug kaubang opisyal.
Nagtoo si Orate nga nakakuha ug leksyon ang mao nga grupo kaniadtong 2017 human namanhig usab kini sa susamang dapit kung asa namatay ang sibiliyan nga 4 ka bulan batang babaye human nga gi-apil sa ambush kung asa target unta niini ang patrol car sa pulis.
