Davao City – Malampusong na-rescue sa otoridad ang usa ka pamilya nga na-trap sa Magsaysay, Davao del Sur human sa sunod-sunod nga linog sa maong probinsya.
Sa interbyu sa DXDC RMN Davao kang Anthony Allada, information officer sa Magsaysay, Davao del Sur, gilayong gihimo ang rescue operation kagahapong adlawa, November 6, 2019 human ang impormasyong adunay usa ka pamilya nga na-trap sa Sitio Limonso, kinse kilometros gikan sa Purok 8, Brgy. Maibo, Magsaysay, Davao del Sur.
Gibaktas sa rescue team ang lugar alas-12:15 sa udto ug nakaabot alas-2 sa hapon diin na-rescue ang 6 katao nga gikalabutan sa 3 ka babae nga sila Amanda Balilid, 84-anyos, Marisa Muñoz, 17-anyos ug Imelda Emilio, 46-anyos, ug 3 ka lalaki nga sila Felipe Emelio, 55-anyos, Ronie Masili, 33-anyos, usa ka bedridden ug Baby Reymar Masili, siyam ka bulan nga bata.
Daling gidala ang duha ka miyembro sa pamilya sa evacuation camp sa Brgy. Malibo samtang gidala usab ang upat sa Southern Philippines Medical Center (SPMC).
Nasayran nga na-trap ang nahisgutan tungod sa pagdahili sa yuta tungod sa sunod sunod nga mga pagtay-og.
RadyoMaN Kirby Manzon
