General Santos City—Nagpadayon ang gihimong pag imbistiga sa Police Station 1 kalabutan sa nahitabong pagpanunggab sa usa ka KTV bar nga nahimutang sa Pioneer Avenue, Barangay South, Gensan nga gikamatay sa usa ka minor de edad ug pagkaangol sa kaubanan niini.
Patay ang biktimang si Jayson Basenoc, 16 anyos nga taga Purok Balunto, Barangay Labangal, samtang angol ang laborer nga si Jeric Caluyan nga taga Olarte Village, Barangay Labangal human gidunggab sa grupo sa Children in Conflict With The Law (CICL) o mas naila sa tawag nga “Sukarap”.
Sa inisyal nga imbistigasyon, alas 9:30 ang takna kagabie samtang nag inum ang mga biktima sulod sa Aliwalas KTV bar, sila natripan sa grupo sa mga batan-on. Sila gipangayuan ug ilimnon, sa unang higayon nihatag pa ang mga biktima apan sa ikaduhang higayon wala na mihatag ang mga nasangpit mao nga nasuko ang mga suspek.
Didto na nahitabo ang kumusyon nga misangko sa pagpanunggab. On the spot patay ang 16 anyos samtang samdan sa likod si Caluyan. Paspas sab nga misibat ang mga suspek sa wala sayring lugar.
