Patay ang usa ka pasahero sa bus human nagbangga ang usa ka Bucana Transit Bus ug ang Kia Bongo truck nga gipanag-iyahan sa usa ka pulis alas 2 sa hapon kagahapong adlawa sa Purok 5, Lumbo, Valencia City.
Naila ang maong namatay nga pasahero nga si Lucita Pinoye Bayan-on, 66 anyos nga lumulupyo sa P-2, Dologon, Maramag, Bukidnon.
Samtang ang mga sakay sa bus ug ang mga police nga sakay sa bongo nga naka-angkon ug mga samad ug bun-og sa kalawasan ug dali usab nga gipangdala sa nagkadaiyang tambalanan sa siyudad sa Valencia.
Sa gihimong imbestigasyon sa Valencia City PNP, gidrayban ang Bongo ni PSSNGT. Erwin Galilea nga taga Poblacion, Kalilangan, Bukidnon nga na-assign sa Kalilangan Municipal Police Station. Samtang ang bus gimaneho ni Valentine Salac Jr. minyo nga taga-P 4, Migkuya, Maramag, Bukidnon.
Nasayran nga ang bus gikan sa lungsod sa Kibawe, Bukidnon sakay ang 20 ka mga pasahero, apan paghidangat maong lugar gikasugat niini ang double cab KIA Bongo color green gikan sa Malaybalay City, Bukidnon sakay ang lima ka mga pulis.
Sa interview sa RMN ngadto kang Traffic Investigator San Rio Dy, gibutyag niini nga sa inisyal nga imbestigasyon nga iyang gihimo gipahayag sa mga sakay sa bongo nga nikawat sila ug dalan sa bus tungod ka naglisud pagcontrol sa manobila ang driver sa bongo tungod usab kay kurbada ang nahisgutang lugar ug kadanlog sa dalan.
Sa habig usab sa Bucana Transit bus gikabig sa driver ang iyang manubila para dili magkabanggaanay apan pakyas kini ug nabanga gayud sa bongo ug nitakilid paingon sa bung-aw hinungdan sa pagkahulog niini.
Sa karon gihulat na lamang sa pulis ang mga pasahero nga intersadong muduso ug kaso ngadto sa piskalya.
