KABANKALAN CITY, NEGROS OCCIDENTAL – Dumot kag hinubog nagresulta sa kamatayon sang isa ka amay matapos ginpulihan sang 6 ka mga suspek kag gintiro sang isa sa mga ini kagab-i sa Purok Bakhaw, Brgy. Bantayan, ciudad sang Kabankalan.
Nakilala ang biktima nga si Edwin Paver, legal ang edad kag pumuluyo sang amo nga lugar.
Ginkilala naman ang 5 sa anum ka mga suspek nga at large nga amo sanday Ronnie Barela, Bobby Ramos Alyas Bambam, John Rico Yusan kag Fernando Ramos III. Si Rey Yusan naman ang gindala sa ospital bangud ini siya ang nasamaran man sa amo nga insidente.
Samtang, nadakpan ang isa sa mga suspek nga si Ronald Barila.
Suno sa pagpangusisa sang Kabankalan City Police Station base sa pahayag sang asawa sang biktima nga si Elsie Paver nga nagsugod ang tanan sang nagligad nga tuig 2017 kon diin ang ugangan sang isa sa mga suspek nga si Bambam ang nagkadto sa ila balay kag nag-inom inom upod sa biktima nga si Edwin.
Ginpahayag ni Elsie nga sang nagpauli na ang ugangan ni Bambam kag bangud hubog na, nagpagwa ini sang istorya nga “kuno” nagsiling si Edwin nga patyon niya si Bambam.
Sumugod sadto, posible nagdumot na si Bambam tubtub nga naglab-utanay gid sila kagab-i bangud nga naka-inom naman upod ang mga suspek.
Siling sang asawa sang biktima, si Rey Yusan ang una nga nagkadto sa ila balay bitbit ang sulpak kag binangon kag nagsunod ang iban nga mga suspek kag gin-bato ang ila balay.
Sang amo nga tion, yara sa gwa sang ila balay si Edwin gani ginhambalan ini sang iya asawa nga magsulod, apang wala ini nagpati, tig-aylo naglibot ini sa likod kag didto na nagsumalangay sila ni Yusan.
Nag-angkon sang 5 ka igo sa iya lawas ang biktima partikular sa idalum sang iya abaga, wala nga dughan, idalum sang pusod kag duha sa paa nga amo naman ang gintunaan sang iya kamatayon.
Antis pa man natiruhan si Edwin, ang mga suspek ang may nalab-an man nga sanday Sonny Ferrer kag Eirel Escamis nga ara subong sa ospital sa Bacolod. /dyHB BACOLOD
