Isa patay, apat pilason sa nagluntad nga pagsigabong sang tangke nga gingamit sa pagpahabok sang balloons sa Purok Reloquemas, Brgy. Poblacion, Norala, South Cotabato alas 9:15 kahapon sang aga, Disyembre 27, 2020.
Ginkilala ang nabawian sang kabuhi kay Jeffren John Cabuhay, samtang pilason naman ang ginikanan sini nga sanday Neilfren Fanuga Cabuhay, 40-anyos, kag Geralden Antoy Cabuhay, 39 –anyos, pareho balloon vendor kag duha pa ka 10-anyos nga mga bata nga lunsay residente sang Purok Santos, Barangay Zone III, Koronadal City.
Sa imbestigasyon sang Norala MPS bag-o pa man ang insidente ang mga biktima ang nagapahabok sang balloons sa Rapista Residence sa Barangay Poblacion sa banwa sang Norala sang aksidente nga nagsigabong ang gingamit nga LPG tank.
Suno sa mga nakakita nga isa sa biktima ang may ginsagol nga wala nahibaluan nga chemical solution sa LPG tank kag samtang nagapahabok sang balloons ang mga biktima nagsigabong ang tangke.
Gilayon naman nga gindala sa Norala District Hospital ang mga biktima para sa nagakaigo nga medikasyon, apang gindeklarar nga dead on arrival ang 10-anyos nga bata sang mag-asawa.
May-angot sini, nagrequest naman sang technical investigation sa Explosive Ordinance Disposal Unit (EOD) kag SOCO team sa Crime Laboratory ang Norala MPS agud nga i-determinar ang rason kag ang gingamit chemical nga nangin kabangdanan sang eksplosyon.
Ginpahayag naman ni PDRRMO Action Officer Rolly Aquino nga sa subong padayon nga ginapaidalom sa medikasyon ang mga biktima.
photo by: RD Aquino
