Nawad-an matud pa ug break hinungdan na-disgrasya ang usa ka Elf truck sa Sitio Langga, San Vicente lungsod sa Sumilao, Bukidnon, kagahapon.
Sa interview sa RMN Malaybalay ngadto kang P/Senior Inspector Dennis Cerilla, ang hepe sa Sumilao Municipal Police Station gibutyag niini nga paingon matud pa sa reunion didto sa El Salvador City, Misamis Oriental gikan sa Impalutao, Impasug-ong, Bukidnon ang mga biktima apan pag-abot ninii sa mao nga dapit nawad-an ug break.
Matud ni Cerilla nga nahitabo ang disgrasya alas 11:30 kapin kon kulang kagahapon sa buntag.
Gimaneho ni Christopher Cuario, 35 anyos ang Elf Truck nga nagdala sa Plate number nga XHB 858.
Matud ni Cerilla nga gisaysay sa driver nga nawad-an ug break ang ilang gisakyan duha ka kilometros sa wala pa ang dapit nahitabuan.
Wala na matud pa namaniobra pa sa driver ang mao nga sakyanan tungod kay kusog na ang dagan ug pakurbada pa ang karsada.
Mukabat matud pa sa 60 kapin kon kulang ang sakay sa mao nga Elf, diin 53 niini ang nasamdan.
Gi-ingon sa hepe nga sa 53 nga nasamdan, usa ang nakabsan sa iyang hinulamang kinabuhi nga si Florida Sabido kagabie.
