General Santos City – mukabat sa pito ka mga personahe ang angol human nga gipamusil gumikan sa bangi sa yuta sa may Prk 1 Sto. Rosario, Brgy Glamang, Polomolok, South Cotabato, alas 4:00 ang takna sa hapon, Miyerkules, August 23, 2017.
Ang namatay nailhang si Dodo Cawag, residenti sa Upper Puting Bato, Barangay Calumpang, samtang ang angol nailang silang si Dionicio Andojar, 31-anyos, residenti sa Brgy Calumpang, kansa nakaangkon ug samad sa tuo nga tiil, Ricardo Molarto, 55-anyos, residenti sa Prk 4, Sto. Rosario Brgy Glamang, nga nakaangkon usab ug samad sa paa.
Samdan usab silang Jevin Galindo, 25 anyos, residenti sa Brgy Calumpang, Gensan; Juancho Malinog, 37-anyos, residenti sa Purok Saeg, Calumpang; Reynald Talatara, 16 anyos, Residenti sa Purok Sto. Niño, Brgy Glamang, Polomolok; ug Eleazar Tequillo, 29 anyos. Damay usab si Elma Barion human naigo sa bala sa pusil sa mga suspek samtang naglingkod lang duol sa lugar dihang nahitabo ang insidenti.
Sa inisyal nga imbistigasyon sa kapulisan ang namatay ug mga angol pulos gi-hire matud pa sa pamilyang Chua kansa nanag-iya sa giilugang Luna sa may Purok Sto. Rosario kansa gisulod sa mga squatter.
Sumala ni Police Sr. Inspector Hernan Gabat, Deputy Chief Of Police sa Polomolok PNP nga tumong unta sa mga biktima nga kuralon ang luna nga gipanag-iyahan ni Dalipay Chua apan dunay kumusyon nga nahitabo atol sa pagsulod sa mga nahisgutan. Sila gipamusil sa wala pa mailhing mga suspetsado kansa gituohang mga miyembro sa Ogan ug Soriago Clan.
Usa ang on the spot patay samtang angol usab ang pito pa ka mga biktima. Wala usay natalang namatay o naangol sa bahin sa mga squatter.
Human sa insidenti, gilayon usab nga nagpahigayon ug imbistigasyon ang kapulisan sa lugar apan wala na makaplagan ang mga responsabli ug wala usay narekober nga armas gikan sa lugar nga gigamit sa mga suspek sa pagpamusil.
Sa kasamtangan padayon ang imbistigasyon sa kapulisan kalabutan sa insidenti samtang gikatakdang ilang balikan ang area alang sa dugang pang imbistigasyon.
