Patay ang driver sa Elf Cargo Truck human ang aksidente sa Sayre Highway, Purok 2, North Poblacion, lungsod sa Maramag, Bukidnon.
Sa interview sa RMN Malaybalay ngadto kang Major Gil Agpaoa, ang commander sa Maramag Municipal Police Station gibutyag niini nga alas 12 sa udto niadtong adlaw nga Sabado (December 14, 2019) nakasinati ug pag-ulan-ulan sa mao nga lungsod hinungdan aron mahimong danlog ang dalan.
Matud ni Agpaoa nga sa ilang imbestigasyon nasayran nga paingon sa Davao City ang Rural Aircon Bus ang gimaneho ni Jeffrey Antecristo, 46 anyos nga taga Libertad, Quezon, Bukidnon samtang paingon sa direksyon sa Malaybalay ang Elf nga gimaneho ni Jojo Adolfo, 35 anyos nga taga Barangay Tugop, San Fernando, Bukidnon.
Nag-ovetake matud pa ang Elf sa usa ka motorsiklo apan pagkakita niini sa bus, kalit kining ni-apply ug break apan tungod sa kadanlog sa dalan wala na niini na kontrolar pa ang dagan sa iyang gimaneho nga maoy hinungdan nga nibangga kini sa bus.
Sigun sa hepe nga gidala sa balay tambalanan ang upat ka sakay sa Elf apil ang driver apan nakabsan sa hinulamang kinabuhi ang driver niini samtang anaa na sa luwas nga kahimtang ang asawa niining si Marian Adolfo ug duha ka mga anak nga nagpangidaron ug 6 anyos ug 9 anyos.
Sa habig sa rural bus, adunay lima ka mga pasahero ang nasamdan sa mao nga aksidente nga sila si Danielle Macapili, taga Mati, Davao; Cherry Ponteras, Eleanor Tadle, Anita Baguio nga pulos taga Quezon, Bukidnon ug Mitchelle Bardon taga Lumbo, Valencia City.
Sa karon gikostudiya na sa PNP Maramag ang driver sa bus alang tukmang disposasyon.
