Patay ang driver sang motorsiklo sa nagluntad nga vehicular accident sa Dahlia St. Brgy. Poblacion, Polomolok, South Cotabato, alas 6:30 kahapon sang aga, Disyembre 18, 2020.
Ginkilala ang biktima kay Julito S. Melendres, 59 –anyos , may-asawa kag residente sang Prk. Hechanova PMCO Salada, Brgy. Poblacion Polomolok South Cotabato.
Imbolbado sa nasambit nga insidente ang isa ka unit sang Isuzu Truck Dropside (V1), ginamaneho ni Raymund Destajo Salloman, 36 -anyos, residente sang Prk. Villegas Koronadal City kag Skygo Wizard 125 ginamaneho sang biktima.
Sa imbestigasyon sang Polomolok MPS ang V1 ang padulong sa General Santos City kag pag-abot sa lugar, aksidente sini nga nabungguan ang motorsiklo nga nagasubay sa kapareho man nga direksyon.
May-angot sini, nagresulta ini sang malala nga head kag body injuries sang driver sang motorsiklo nga nangin tunaan sang kamatayon sang biktima, samtang ang driver sang Isuzu Truck Dropside ang gindala man sa ospital para sa nagakaigo nga medikasyon.
