General Santos City—1 ang patay sa nahitabong engkwentro tali sa mga suspetsado ug sa tropa sa Polomolok PNP Pasado alas 8:00 kagabie sa may Pagalungan Highway, Polomolok, South Cotabato. Suspek giilang si Bensaid Nilong alias Saiden Nilong, legal age ug residenti sa Polomolok.
Sumala ni PRO-12 Regional Director Police Chief Supt. Marcelo Morales nagpahigayon ug checkpoint ang mga pulis sa Pagalungan highway dihang miagi matud pa ang mga suspetsado sakay sa duha ka motorsiklo nga walay plaka numero.
Gipahunong ang mga nasangpit sa checkpoint apan wala mihunong mao nga natigayon ang ginukdanay nga misangko sa panag-engkwentro. Si nilong maoy napuruhan samtang mga kaubanan niini malampusong nakasibat. Si Nilong ugmga kaubanan niini ang suspek matud pa sa sunod-sunod nga kinawatay, pagpanulis ug pagpangarnap sa lungsod sa Polomolok.
Walay naangol sa han-ay sa kapulisan apan gidala sa ospital ni Police Chief Inspector Orcajada, hepe sa Polomolok PNP human nabalian ug bukog dihang miambak kini sa iyang sakyanan atol sa pagpaulan sa mga suspek ug bala ngadto sa kapulisan.
