Patay ang usa sa duha ka target sa gihimong joint drug buy bust operation sa Provincial Drug Enforcement Unit kon PDEU ug Don Carlos Municipal Police Station human nisukol sa kapulisan.
Nasayran nga ang mga suspek, apil usab sa gitudlong responsable sa pagpangarnap sa lungsod sa Maramag ug siyudad sa Valencia.
Matud sa PNP Don Carlos nga samtang nagpahigayon sila sa buy bust operation kaganehang kadlawon sa Purok 10, Poblacion Sur, Don Carlos, Bukidnon, nisukol si Bucare Macasasa alyas “Tataro”, hingkod ang pangidaron, ug lumulupyo sa Purok 1A, South Poblacion, Maramag, Bukidnon hinungdan aron nag-return fire ang kapulisan nga nagresulta sa pagka igo sa suspek sa maka-unom ka higayon.
Gisulayan pa kini ug dala sa balay tambalanan apan gideklarang dead on arrival.
Samtang sa mao nga operasyon, dakpan usab ang usa ka Richello Arcayan, 28 anyos, ug nagpuyo sa Kianggat, Dangcagan, Bukidnon.
Ang duha susamang benepisiyaryo sa plea bargaining agreement (PBA).
Ubay-ubay usab sa pakete sa gituohang shabu ang nakumpiska sa kapulisan ug narekober usab ang 45 calibre sa armas nga gikan sa napatay nga suspek.
Sa karon gi-andam na ang kasong adunay kalambigitan sa RA 9165 batok sa mga suspek.
