iFM Laoag – Inpabuya ken inpresentar ni Laoag City Mayor, Honorable Michael Marcos Keon idi kalman Oktubre 14, 2019, dagiti nadanunan ken naubraan na iti makaisangasut nga aldaw a panagtugawna iti pwestona wenno iti naulloan a “The First 100 Days Accomplishment Report” iti mismo a Laoag City Multipurpose Hall.
Inbinsa-binsana amin dagiti topico a pakairaman ti panangidaulona iti baro a Laoag babaen ti panagbitlana ken iti powerpoint presentation. Kas iti biang ti agrikultura, turismo, edukasion, imprastraktura ken kangrunaanna iti panangprotehir ti aglawlaw, a maipalagip daydi didigra a napasaran ditoy probinsia ti Ilocos Norte itay kallabes a bagyo nga Ineng.
Naiparang babaen dagiti imahe iti powerpoint dagiti nadanunan ken nagappaoanan ti mayor iti las-ud ti sangagasut nga aldaw a panangidaulona iti siudad. Kas kuma iti pannakainstolar dagiti libre a wifi kadagiti nagduduma a lugar ti Laoag City, ken dagiti plano a mainstolaran pay, pannakaimplementar ti road clearing operations nu man pay adu dagiti nadaldalapus a pasdek negosio ken establishimento, pannakapapintas iti tiendaan ken pannakatratar dagiti problema ti Laoag City General Hospital, ken dagiti gakat ken programa a pagimbagan pay iti siudad.
Inpagunam gunam na a nu man pay saan nga isut napartak ti pagdur-san ti siudad ket siniguradona a nalimpio dagiti agbalin nga epekto dagiti trabahona ken inbingayna iti pilosopia a panpandaganna a “slowly but surely.”
Kabayatanna, immatendar met dagiti nagduduma nga opisyales ti siuadad, nagduduma a department heads, ken dagiti pay non-government organization ken nagduduma pay a bisbisita. (Joe Anne Agustin, RMN News)
