Davao City – Diskwalipakado sa relokasyon sa lokal nga kagamhanan ang mga nanimuyo daplin sa Davao River partikular ilawom sa Bolton Bridge ning siyudad.
Walay ni usa sa mga nagpuyo ubos sa Bolton bridge nakapasar sa mga rekisitos sa kagamhanang lokal aron mabalhin sila sa relokasyon sa may Tugbok ning dakbayan.
Segun ni Davao City Planning and Development Officer Roy Rigor nga migula sa ilang assessment nga arangan ang kahimtang sa mga residente gani daghan kanila aircon ang mga puy-anan.
Busa malisod matud pa nga makonsidera ang nasangpit nga mga residente nga mga indigent aron maka-avail sa relocation sites.
Ang buhaton na lang daw sa kagamhanang lokal mao ang pagpalit og lapad nga luna nga kabalhinan sa mga pamilya apan ipailawom sa Housing Finance.
Aduna na lama’y pila ka semana ang 100 ka gatos ka pamilya nga nagpuyo sa Bolton bridge aron bulontaryo bungkagon ang ilang mga balay ug hiklingan ang mao nga dapit.
Kahinumduman, gimando ni Mayor Inday Sara Duterte-Carpio ang pagpahawa sa mga nagpuyo kilid sa Davao River nunot sa delikado nga panahon ilabi na og musaka ang level sa sapa sama sa nahitabo niadtong bulan sa Disyembre miaging tuig.
RadyoMaN Joel Viray
