Mukabat ngadto sa 108 ka mga illegal street vendors sa dakbayan sa Malaybalay ang i-relocate human na apektuhan sa road clearing operation.
Ang mao nga lakang tungod sa marching order ni Pangulong Rodrigo Duterte nga limpiyuhan ang karsada gikan sa obstruction kon babag.
Dinhi sa Malaybalay gipatuman sa city government ang road clearing sa national highway ug sa mga secondary roads nga nagresulta sa mao nga relocation sa illegal street vendors.
Nasayran nga sugod Oktubre 1 ning tuiga nahawan na ang dalan gikan sa Sumpong paingon sa Barangay 7 ug ang secondary road nga nahimutang sa
Poblacion Barangay 5.
Ang composite team gipangunahan ni Executive Assistant, Roberto T. Flores, kauban ang Department of Interior and Local Government, Philippine National Police, Bureau of Fire and Protection, ug City Engineer’s Office ug ang civil society sector nga gi-representahan sa REACT.
Matud sa City Market Committee, nga ang ma-relocate nga illegal street vendors muabot sa 140 hangtod 150 pagkahuman sa final validation nga gihimo dili pa lamang dugay.
Ang City Economic Enterprise Development and Management Office (CEEDMO) kauban ang City Anti-Illegal Vending Task Force (CAIVTF) maoy mo-facilitate sa pagbalhin sa mga illegal vendors ngadto sa merkado publiko sa Barangay 9.
Ang bag-ong site maghatag sa kada vendor ug 1 x 1.4 meter nga espasyo aron sa pag-operate ug pagbaligya sa ilang mga goods o produkto.
Giklaro usab sa CEEDMO nga kadto lamang nasutang nga illegal vendors nga apektado sa road clearing operation ug na validate ang tugutan nga maka-apply sa slots sa public market.
