Liwat naman nga nagpanmgibabaw ang West Visayas State University- College of Nursing sa ginhatag nga Nursing Licensure examination ukon NLE.
Ini matapos makaangkon ini sang 100% nga passing rate kon sa diin nakapasar tanan ang 170 sini nga mga examinees.
Kaupod sang WVSU- CON nga yara sa top 1 amo ang Velez College kag Xavier University nga may 100% man nga passing rate.
Ang iban pa nga top performing schools sa Nursing Licensure Examination amo ang University of Pangasinan, Bicol University-Legazpi, Ateneo De Zamboanga University, Adventist University of the Philippines kag Unibersidad de Sta. Isabel.
Nahibaluan nga sa ginpaguwa nga resulta sang Professional Regulation Commisison ukon PRC, naglab-ot sa 4,326 ang mga nakapasar gikan sa 9,873 nga mga nagkuha sang nasambit nga pasinawan.
Ang NLE ginhatag sang PRC sini lamang nga bulan sang Hunyo sa mga siyudad sang Manila, Baguio, Cagayan de Oro, Cebu, Davao, Iloilo, Legazpi, Lucena, Pagadian, Tacloban, Tuguegarao, kag Zamboanga.
