Nagalab-ot sa 108 ka ektarya sang pananom partikular na palay ang indi na mapuslan tungod sa pagbaha sa banwa sang Norala, base sa datos sang ila nga Municipal Agriculture Office, suno kay Municipal Disaster Risk Reduction and Management Action Officer Aiza Lim.
Pahayag ni Lim nga ang mga barangay nga malala nga naapektuhan sang pagbaha tungod sa paglapaw sang Banga River amo ang San Miguel, Kibid, Dumaguil, Matapol, Puti, BS Aquino kag Simsiman.
Ginkumpirmar man ni MDRRM Action Officer Lim nga naguba man ang dike sa San Miguel, BS Aquino kag Dumaguil.
Yara naman 30 ka mga pamilya ang ginpabakwit sa Villa Clara, Brgy. Matapol nga sa subong nagatinir sa ila nga mga himata kag Brgy. hall.
Samtang suno kay Lim tigayon naman nga naghatag sang inisyal nga ayuda ang local government unit sang Norala sa mga apektado nga pamilya sang pagbaha.
Magapatigayon naman subong nga adlaw sang emergency meeting ang MDRRMC Norala kon kinahanglan nga magdeklarar sang state of calamity tungod sa natuga nga danyos sang pagbaha sa banwa.
Magapadayon naman ang search and retrieval operations subong nga adlaw kay Prudencio Moreno nga naanod sang nagaragasa nga tubig baha.
