Davao City – Ubay-ubay sa gihapon sa kababayen-an ang na-abuso sa ilang kapikas gumikan sa economic dependence.
Kini mao ang gibutyag ni Integrated Gender and Development Division head Lorna Mandin atol sa pagsaulog sa ika-109 International Womens Day nga gipahigayon sa People’s Park ning syudad sa Davao diin tema nila mao ang “Ekonomikanhong Pagpagahum sa Kababayen-an Dalan Ngadto sa Tiunay nga Kalamboan.”
Sumala ni Mandin nga sa milabay’ng katuigan sagad sumbong sa kababayen-an mao ang wala pagsustento kanila.
Apan segun sa nangulo sa IGDD, mikunhod sa kapin 1700 ka mga kaso ang natala gikan 2000 ka mga kaso sa economic abuse base sa ilang natala gumikan usab sa kanunay’ng pag-edukar sa kalalakin-an.
Samtang gihulagway ni Mandin ang kababayen-an sa dakbayan nga mitaas na ang kahibalo sa ilang katungod.
“Makadungog ko sa mga lectures ug visit sa barangay nga nagtaas ang ilang kahibalo and they started to claim their rights by reporting and muadto sa mga ahensiya para mag reklamo,” saysay niini.
Ang maong aktibidad gitambongan sa tanang Local Government Units (LGU), National Government Agencies, Non-Government Organizations (NGOs), tanang 182 ka mga barangay lakip ang volunteer groups.
RadyoMaN Jason Amisola
