10ID: Zero deaths sa mga sundalo vs NPA combat operations

Davao City — Gipasigarbo sa 10th Infantry Division Philippine Army nga zero deaths kun walay bisan usa sa ilahang mga sundalo ang namatay sa mga combat operations tali New People’s Army sukad Enero hangtod Nobyembre 8, 2022.

Gibutyag ni Captain Mark Anthony Tito, 10ID spokesperson, nga epektibo gayod ang ilahang mga nahimong stratehiya ug natuman sa mga personahe ang standard operating procedures diha sa luwas nga combat operations sa ground.

“Highly professional na ang atong kasundaluhan, we have this army transformation road map, padayon ang atong mga trainings, mga exercises and of course good intelligence pod gikan sa atong different units kay dili pod nato makab-ot ang mga successful operations kung wala tay nindot nga intelligence gikan sa intel community,” matud niini.

Gitudlo ni Tito nga dakong tabang aron makab-ot ang maong kalampusan ang suporta gikan sa komunidad diin nawad-an na og suporta ang mga kalaban sa gobyerno.

Sa datos sa 10ID, nakatala og walo ka mga wounded in-action sa militar samtang 433 ka NPA ang naneutralisar diin 19 ang napatay, 27 ang nadakpan, 387 ang ihap sa mga mitahan ug 298 ka mga high powered ug low powered firearms ang nasakmit karong tuiga.

RadyoMaN Aimee Guinita