Davao City- Dakong hagit karon sa 10th Infantry Division Philippine Army ang pagpulpog sa CPP-NPA-NDF sa rehiyon onse nga adunay timeline hangtud sa buwan sa Disyembre karong tuiga.
Gibutyag ni 10th ID Deputy Commander Brigadier General Bienvenido Datuin nga hangtud sa Disyembre ang ilang target nga timeline aron humanon ang suliran sa insurhensiya sa rehiyon onse ug sa tibook nasud.
Sigun ni General Datuin nga ilawom sa ilang area of area of responsibility naay 13 ka front committee ug ang pinakadako nga puwersa ang SMRC sa rehiyon onse.
Dugang sa opisyal buhusan sa dakong puwersa sa militar ang mga lugar sa Paquibato, Baguio, Marilog district, Arakan, ug Bukidnon Boundary aron gukdon ang mga NPA nga anaa ani nga mga lugar.
Nasayran gikan sa Deputy Commander nga laing upat ka battalion ang madugang sa kasamtangan nga puwersa sa 10th Infantry Division aron tuldukan ang kalihukan sa mga komunista dinhi sa rehiyon.
Nagtoo ang heneral nga kung ugali mulampos ang militar sa misyon sa paghurot sa mga NPA hingpit sab mabungkag ang CPP-NPA-NDF ug mabalik ang kalinaw sa Mindanao ug sa tibook nasud.
Sigun ni Datuin, lakip sa ilang gipangandaman ang counter measures batok sa pagahimoon nga propaganda sa mga militante aron gub-on ang militar sa publiko.
Kahinumduman, nagpakanaog og direktiba si Presidente Rodrigo Duterte ngadto sa Armadong Kusog sa Pilipinas nga sunod bungkagon ang CPP-NPA-NDF human sa teroristang Maute group sa Marawi City.
Kasamang Joel Viray
