Gi-cordon sa mga health officials ang 11 ka mga balay sa Zone 2, Barangay Agusan human nagpositibo sa Corona Virus Disease o COVID-19 ang usa ka 44 anyos nga babayeng cashier sa usa ka private company.
Mao kini ang gibutyag ni Dr. Joselito Retuya, Epidemiologist sa City Health Office.
Matud ni Retuya nga mikabat usab sa 37 ka mga tawo sa maong dapit, nalakop sa focus containment nga gimando ni Mayor Oscar Moreno aron pagsiguro nga mapugngan ang pagtakod takod sa maong virus.
Gibutyag ni Retuya nga ang upat ka mga tawo nga kampanya sa maong Covid positive Patient ila nang gipahimutang sa Isolation Units sa City hall.
Matud ni Dr. Retuya nga tungod sa maong kaso ilang gipalapad ang ilang active health surveillance sa Zone 2, Barangay Agusan.
Sa pikas nga bahin, misaka na sa 28 ka mga tawo ning syudad ang nagpositibo sa covid-19.
Kini human nakit-an sa health expert ang usa ka 22 anyos nga lalaki nga taga barangay Bulua ning syudad.
Matud ni Retuya nga ang maong bag-ong covid positive patient usa ka locally stranded Individual nga gikan sa Cebu City.
-o0o-
