Davao City – Napulo na ka mga drug pushers ang nadakpan sa Bunawan PNP sukad niadtong bulan sa Enero hangtod karong bulana samtang usa ang nasikop sa Sasa PNP sa gilusad nga buy bust.
Kini subay sa datos sa Bunawan PNP diin lima na ka operasyon ang gilusad sa Bunawan ug upat na ka operation sa checkpoint sa task force sa may Licanan, Brgy. Lasang.
Sumala ni Police Chief Inspector Estrello Ramiso, station commander sa Bunawan PNP nga mas gipakusgan nila ang kampanya batok iligal nga droga sukad gibalik sa kapulisan ang anti-drug operations ug pagpabanhaw sa Oplan Tokhang.
Gidugang ni Ramiso nga gawas sa droga, ila usab gitutukan ang uban pang krimen sama sa problema sa ilang Area of Responsibility nga mga bata-ong nalambigit sa kawat, pagpanglungkab ug riot.
Sa pikas bahin, wala makaipsot sa mga elemento sa Sasa PNP ang usa ka idlas nga drug pusher atol sa gilusad nga buy-bust operation.
Daling gipusasan sa mga otoridad aron dili na makaikyas pa ang suspek nga mao si Alex Sabid nga nagpuyo sa Kilometer 11 Sasa ning dakbayan alas 5:00 sa hapon.
Sanglit nakalitan ang suspek nga pulis diay ang iyang gikatransact, igo na lang kini naglingo-lingo sa iyang ulo samtang miuban nga malinawon sa mga tinugyanan sa balaod.
Nakuha gikan kaniya ang dugang sachet sa shabu ug lakip na ang 500 pesos nga mark money.
Pasang-atan og sumbong sa Sasa PNP sa piskalya ang dinakpan tungod kay iyang nasupak ang section 5 ug 11 sa article 2 sa RA 9165 kun Comprehensive Dangerous Drugs Act of 2002.
RadyoMaN Don Pulayao/RadyoMaN Joel Viray
