Nagpositibo sa African Swine Fever ukon ASF ang 11 sa 42 ka mga baboy dire sa syudad sang Koronadal nga ginpaidalom sa eksaminasyon, ini ang base sa kumpirmasyon ni Department of Agriculture Secretary William Dar.
Ang nasambit nga mga baboy ang nabakal sa Sulop sang Disyembre sang ngligad nga tuig, apang sang Enero subong nga tuig nakumpirmar nga nagpositibo sa ASF ang mga baboy sa nasambit nga lugar.
Ginpahayag naman ni Koronadal City Mayor Eliordo Ogena nga gilayon nga nakontrol ang balatian kag wala na naglapta pa tungod madasig man nga nareport kag ginlubong ang mga baboy nga nagpositibo sang ASF.
Samtang, ginkumpirmar sang alkalde nga magaistablisar sang dugang nga animal quaratine checkpoints sa syudad agud nga mapunggan ang pagsulod sang mga baboy, karne kag processed foods halin sa mga lugar nga apektado sang ASF.
Ginaapela niya man sa mga pumuluyo nga likawan nga magdala sang karne kag processed foods halin sa mga lugar nga apektado sang nasambit nga balatian.
Magapaggwa man suno pa siya sang executive order nga kon mahimo likawan anay ang paghatag sang damog sa mga baboy tungod dire makuha ang ASF.
