Gikatahong miabot na sa 119 ka mga insidente sa sunog ang natala sa probinsya sa Bukidnon karong tuiga.
Kini ang gibutyag ni Noli Dela Rita ang Regional Information Officer sa Bureau of Fire and Protection (BFP)- Northern Mindanao atol sa interview sa RMN DXMB Malaybalay.
Sumala niya ang maong ihap sa insidente sa sunog sa Bukidnon portion lang sa kinatibuk-ang 590 ka mga natala sa tibook Rehiyon X, diin kinadaghanan Cagayan De Oro City sa 187, gisundan sa Misamis Oriental sa 127, ang Bukidnon sa 119, 60 sa Iligan City, 47 sa probinsya sa Lanao Del Norte, 32 sa Misamis Occidental ug 18 sa Camiguin Island.
Apan giklaro ni Dela Rita nga bahagya nga mikunhod ang maong ihap sa entiro Rehiyon diin gikalipay kini sa buhatan kung ikompara sa milabayng mga katuigan.
Mipahimangno usab si Dela Rita ngadto sa mga mugamit og mga Christmas Lightings nga kinahanglan sulod lang sa panimalay kini itaod ug dili sa gawas aron mahilikay sa insidente sa sunog.
Dugang niya nga likayan usab ang pagtaod niini sa mga metal nga butang ilabi na sa mga grills sa bintana tungod kay kusog gayud ang posibilidad nga makamugna ug sunog.
Sa kinaulahian, gisulti ni Dela Rita ang pag-amping sa kadaghanan ilabi na sa padangat nga kapaskuhan ang maghatag kaluwasan ilabi na sa mga insidente sa sunog.
