Sumala ni Police Major Jonnel Bonguyan, Station Commander sa Eden Police Station, gituohang gilugos patay ang biktima sa wala pa mailhing suspek.
Hulaton pa usab nila ang resulta sa Regional Crime Laboratory Office XI sa gihimong awtopsiya sa menor de edad.
Puno sa garas, bun-og ug bali sa kalawasan ang naangkon sa biktima, timailhan nga grabe ang pag-antos ug kasakit ang nasintian niini sa kamot sa kriminal una kini gipatay.
Gibutyag ni Bonguyan, aduna silay person of interest nga gitutukan sa alegasyong rape-slay case.
Kahinumduman, niadtong Disyembre 3, 2022 adlawng Sabado nisalmot pa sa mga kalingawan sa pista sa Brgy. Sibulan ang biktima ug sa balay sa iyang apuhan na kini natulog pagkabii.
Alas 6:00 sa buntag adlaw’ng Domingo, Disyembre 4, 2022 nisayo kinig hawa aron mupauli na sa ilang pinuy-anan aron musimba apan wala na kini makaabot nga buhi sa ilang balay.
Sa usa ka creek nga adunay gilay-ong 300-500 metros gikan sa balay sa iyang apohan napalgan sa usa ka menor edad nga nangita’g damang ang patay’ng lawas sa biktima pasado alas-11:00 na sa buntag.
RadyoMaN Aimee Guinita
