Bukidnon – Damyos ang government buildings ilabina ang Indulang Elementary School sa Barangay Indulang, Talakag, Bukidnon human nitay-og ang magnitude 5 nga linog alas 3:19 sa hapon kagahapon.
Sa interview sa RMN Malaybalay ngadto kang Israel Johan Damasco, head sa Bukidnon Provincial Disaster Risk Reduction and Management Council gibutyag niini nga padayon karon angi lang assessment human sa mao nga linog. Nasayran nga natala ang usa ka kilometro nga gilawmon sa linog ug tectonic in origin, maong nasinati ang intensity IV nga pagtay-og.
Matud ni Damasco nga sa inisyal nga taho sa LDRRMO sa lungsod sa Talakag, mas labing apektado ang Indulang Elementary School nga gikatahong totally damaged ang duha ka gambalay nga adunay 3 ka class rooms kada ug ang stage sa mao nga tulunghaan. Tulo usab ka school buildings nga adunay 3 class rooms kada usa ang partially damage samtang 12 ka mga panimalay ang totally damage.
Hinoon, wala usay nasamdan sa mao nga pagtay-og tungod kay gipapauli ug sayo ang mga estudyante mga alas 2 sa hapon sa mao nga tulunghaan tungod kay aduna pay aktibidad ang mga magtutudlo sa lungsod. Gitawag usab ni Damasco nga blessings in disguise ang pag-uli ug sayo sa mga magtutungha tungod kay delikado kaayo kung natungnan pa ang mga bata anaa sa tulunghaan sa pagkahitabo sa mao nga linog nianang alas 3:19 sa hapon.
Kanselado usab ang klase sa mao nga tulunghaan tungod kay dili na pwede gamiton tungod kay totally damage ang mao nga mga gambalay.
