Naglab-ot sa 12 ka mga persona ang napilasan sang nagkarambola ang apat ka salakyan sa Brgy. Tatoy, Miagao, Iloilo pasado alas 7 kagab-i.
Ginpahayag ni Chief Inspector Norlan Perante, hepe sang Miagao PNP, nagasumalangay sa karsada ang Isuzu DMAX passenger van nga ginamaneho ni Vicente Muel III,32-anyos sang Brgy. Santa Barbara kag Ford Ranger Pick-Up nga ginamenaho ni Ignacio Espina, 50-anyos sang Brgy. Bacong, Dumangas antes nagluntad ang insidente.
Ginpahayag nga una nga nabunggu-an sang Pick-Up ang tricycle nga ginamaneho ni Ronie Gemotea, 47-anyos sang Brgy. Tatoy, tubtob nagsag-iranay sila sang van.
Nakabunggo pa gid ang Pick-Up sa tricycle nga naga-park sa higad sang dalan suno sa pulis.
Pilason si Gemotea kag ang onse niya ka pasahero nga ginalakipan nanday Luna, 16-anyos; Ma. Lily Ettha Espora, 31-anyos; Samantha, 9-anyos; Princess, 7-anyos; Roldan Magbanua, 21-anyos; Oliver , 13-anyos; Marie, 16-anyos; Paul, 13-anyos; Rafael Molejona, 42-anyos; Niel, 16-anyos; kag Frency , 16-anyos.
Padayon nga ginabulong sa ospital sanday Gemotea, Luna, Samantha kag Frency samtang preso naman sa Miagao Police Station sanday Muell kag Espina.
