Sutaon sa imbestigasyon sa kapulisan kung kang kinsa nga bala ang naka-igo sa 13 anyos nga batang lalaki, kinsa namatay human kini nadamay sa pinusilay tali sa mga pulis ug sa mga armadong lalaki, pasado alas-5:00 sa buntag niadtong Biyernes, Marso 26, sa Barangay Mamaan, lungsod sa Piagapo, Lanao del Sur.
Matud pa ni Col. Rex Derilo, director sa Lanao del Sur police, dili pa masuta kung kang kinsang bala ang nakapatay sa bata nga si Bong Hadjinasser dihang nakapinusilay sa Anti-Kidnapping Group ug uban pang unit sa PNP ug AFP, ang grupo ni Kadafy Manusun Ayonan, kanhi barangay chairman sa Barangay Bangco, nga sakop sa nasangpit nga lungsod.
Magsilbi unta og arrest warrant ang PNP batok kang Ayonan alang sa kasong murder, frustrated murder ug kidnapping, dihang gitagbo sila og pagpamusil.
Milungtad og kapin 30 minutos ang pinusilay nga mi-resulta sa pagkamatay sa target nga si Ayonan ug isa pa ka kauban niini nga nailang si Garcia Muloc Ariraya, amahan sa batang si Hadjinasser.
Miingon si Derilo nga nakasibat ang upat niini ka mga kauban diin ang duha nailang sila si Amirodin Dimakuta ug Ibra Maute Dimakuta.
Posible matud pang hideout sa mga membro sa Dawlah Islmiya-Maute Group ang lugar human makuha ang nagkadaiyang kalibre sa armas ug mga gamit sa pagbuhat og bomba.
Posible usab matud pa nga nagbuhat og bomba ang mga suspek dihang naabtan sa mga pulis ug adunay plano nga pagpamomba human makuha ang mapa ug sketch sa Iligan City ug sa Lanao del Norte. (DMS, March 29)
