Numancia, Aklan – Manog unga eon lang rong 13-anyos nga dalagita matapos gina alegar ginhimuslan ag nahanabdusan ko anang tiyo sa sangka barangay sa banwa it Numancia.
Sa ginpatigayon nga pagpangusisa it RMN News Team nasayuran kay PSSgt. Gemilia Bergalino nga uwa it nabaton nga report rong Numancia PNP angot kara pero anang ginpahayag nga ko nagtaliwan nga buean it Hulyo hay nag-adto biktima kaibahan ro anang nanay ag nagsugid nga ro anang unga hay nabdos ag biktima raya it pagpanghimueos.
Sa pahayag it nanay ko biktima kana nga nakasugid rong unga nga ro anang tiyo nga 20-anyos rong responsible sa paghimueos kana apang kon ro unga hay personal nga ginakutana uwa gid raya nagatuad ito kung ano nga impormasyon kon ano ro natabo ag kon sin o ro responsible nga naghimueos kana.
Gusto gid kunta it mga kapulisan nga sa biktima mismo maghalin rong impormasyon para nga maka plastar sanda it kaso ugaling indi gid raya maghambae.
Sa makaron hay indi pwede nga ma-consider rong pahayag it nanay nga rong tiyo it biktima ro naghimo kara kana.
Plano makaron it Numancia PNP nga hueaton eon lang nga maka unga rong biktima ag aeam-aeaman hay basi nga mgsugid mat-a bangud nga kung pagpiniliton raya makaron hay basi makaeain pa sa anang pag nabdos.
Dugang pa nga plano hay i-isolate anany ro biktima bangud nga ro andang baeay hay kaeapit ma lang man ko baeay it anang tiyo para nga indi man ma stress raya ag maghagan hagan ro anang gina isip.
Sa pihak nga parte, gipahayag pa gid ni PSSgt. Bergalino nga anda man nga ginpanguta rong tiyo nga ginaturong suspek kung may kahilabtanan raya ag uwa man raya magbalibad ag uwa man mag-ako kundi ro anang sabat hay kung ano ro mag guwa sa imbestigasyon it kapulisan haum imaw nga atubangon raya.
