General Santos City—Gikasuhan na sa buhatan sa CIDG-Regional Office 12 ang 13 ka mga indibidwal nga una nang nasikop sa gihimong ronda sa kapulisan sa buhatan sa FMX Financial Consultancy service nga nahimutang sa Calina Street, barangay Lagao, Gensan human nga gireklamo sa mga investors gumikan na usab sa kapakyasan sa maong buhatan nga ihatag ang ilang gisaad ngadto sa mga investors bugti sa kwartang ilang gi-invest.
Ang mga nasikop mao silang si Roger Sulinap, 26 anyos, Asistant manager sa FMX; Bonnie Bonifacio, 31 anyos; Christian Em Canindo, 21 anyos; King Aljon Lopez, 21; Ralf Nather Gomez, 20; Kian Pendatun, 18; Jelsa Patagi, 32; Shiela Mae Manauag, 30; mary Grace Gontinas, 29; Gelli Diagbel, 27; Charon Lyn Canino, 26; Juliet Gacita, 24; ug Cherry Ann Restauro, 24.
Narekober sa kapulisan ang 2 ka unit sa Bill counting machine; usa ka unit sa HP CPU ug mga dukumento.
Sukwahi sa ubang Investment Scheme nga dakong interest ang gitanyag sa mga investors ang FMX ang nagatanyag matud pa ug sakyanan ug motorsiklo ngadto sa ilang mga investors pinaagi sa pag lock-in sa ilang kwarta sa maong buhatan.
Depende sa sakyanan nga buot kuhaon sa usa ka investors ang kantidad sa kwarta nga dapat nilang i-invest sa FMX sulod sa gisabutan nilang binulan.
Nasayran nga una nang mireklamo sa buhatan sa CIDG-12 ang mga investors human nga napakyas ang maong buhatan sa paghatag sa ilang saad ngadto kanila.
Kasong Syndicated large Scale Estafa ang gipasang-at nga kaso batok sa mga dinakpan kansa balhog karon sa silda sa CIDG-12.
