Sa pipila ka dekada nga milabay padayon nagpaabot ug nangandoy ang katawahan sa lungsod sa Godod, ZDN didto sa may 3rd district nga makaangkon ug maayong dalan para hapsay ang ilang pagbyahe gikan sa ilang lungsod padulong sa kasikbit nga mga kalungsuran.
Kun tan-awon ang dagan sa kalambuan sa maong lungsod medyo dugay gayud ang pag irog daw sama kahinay sa lakat sa bao tungod sa kabati sa dalan nga hangtod karon mao ang gimulo sa katawhan sa maong lungsod.
Daghan na ang mga lideres ang mi sulay pagdumala sa maong lungsod tungod sa mga rason buot nilang haw-ason ang lungsod sa Godod gikan sa pinakaubos dad-on ngadto sa taas apan natapos nalang ang ilang termino wala gayud natuman ang ilang mga saad.
Tungod sa walay maayong dalan, walay bisan usa nga mga negosyante ang mangahas nga magtukod ug negosyo.
Karon hinay-hinay na nga mi uswag ug milambo ang lungsod sa Godod pinaagi sa pagpangulo ni Mayor Abel “Toto” Matildo, iyang nahimo ang pagpadagan sa kahapsay ug kalinaw sa iyang lungsod sama sa pag awhag sa mga naghupot sa mga ihalas nga armas nga itahan na, paghatag ug seguridad sa iyang mga konstituwente ug pag implementar ug mga proyekto sama sa imprastraktura.
Karong umaabot Agosto 25, 2018, himoun ang ground breaking sa 19km Road Concreting gikan sa utlanan sa lungsod sa Salug padulong sa lungsod sa Godod, adunay kini budget nga moabot sa 137 milyones motambong mismo ang Mayor sa maong lungsod aron saksihan ang ground breaking. Nahimo kini nga proyekto pinaagi sa pagpaningkamot ni Godod mayor Abel Matildo nga mahatagan ug maayong dalan ang iyang ginsakpan.
Nagtuo usab si Mayor Matildo kun hingpit na kining mahuman ang kongretong dalan posible unya dugokon ang lungsod sa Godod ug mga dagkong negosyante nga mamuhunan sa maong lungsod.
