RMN Laoag City – Narambak, naragsak ken ballaigi ti naisayangkat a Mister International 2019 Pre-competition idi rabii iti Ilocos Norte Centennial Arena.
38 a natataraki a lallaki ti nakipagpaset ti kompetisyon manipud iti nagduduma a pagilian para iti korona a Mister International 2019.
Impabuyada ti laeng ken talentoda iti panangawitda kadagiti national costume, swimwear ken kasta pay formal wear. Naalada met ti rikna dagiti agbuybuya babaen ti nasasam-it nga isemda ken kasta pay iti nabaked a bagida.
Napagasatan met ni Mister Australia Harrison Luna, agtawen ti 21 a nangiyawid ti special award kas Mister International Ilocos Norte 2019 nga inyawat ti Provincial Tourism Office ti panangidadaulo ni Mr. Aian Raquel.
Presente ti okasyon ni Mister Alan Sim, ti makinkukua ti Mister International Pageant, Mister Carlo Morris Galang, president ti Prime Events Productions Philippines Foundation Inc., Pawee Ventura ti Missosology ken Laoag City Councilor Handy Lao, a maysa kadagiti pioneering sponsors iti Pilipinas.
Maisayangkat met ti Final Round inton maika-24 ti Pebrero sadiay One Esplanade, Pasay City, Manila.
Bernard Ver, RMN News
