Ginpatay sang suspek nga “agi” ang 14-anyos nga bata nga lalaki nga natipuhan sini sa isa ka baylehan sa banwa sang Balasan kaina sang kaagahon.
Sa imbestigasyon sang Balasan PNP, ginpahayag ni Police Chief Inspector Kenneth Panesa nga natabu ang insidente mga alas 12:50 kaina sang kaaghahon kon sa diin nagpamayle ang biktima upod sa 8 ka iban pa sa barangay Tinggi-an, Balasan nga nagahiwat sang kapistahan.
Suno kay Panesa nga natipuhan sang suspek nga agi nga si alyas Smile ang biktima kon sa diin ginguyod niya ini kag gindala sa lugar nga maligwin kag malayo sa baylehan.
Didto ginmolestyahan sang suspek ang biktima kon sa diin gindaskan sini sang matig-a nga bagay ang alatrasan sini.
Ginpahayag ni Panesa nga masobra isa ka oras pa nga pagpangita sang mga kaupdanan ang biktima antis ini makit-an.
Gindala gilayon sa Jesus Colmenares District Hospital ang biktima apang gindeklarar nga dead on arrival ukon DOA.
Base sa post-mortem examination sang municipal health officer sa bangkay sang biktima, nakita nga gindaskan sang matig-a nga bagay ang alatrasan sini nga nagresulta sang internal hemmorhage nga kabangdanan sang iya kamatayon .
Nagapabilin naman nga at large ang suspek kag padayon nga ginapangita sang mga pulis.
Suno kay PCI Panesa nga may kasubong man nga kaso si alyas Smile sa Capiz kag may kaso man ini nga carnapping sa banwa sang Estancia.
Igapaidalum naman sa autopsy ang bangkay sang biktima agud masiguro kon ano gid ang gintunaan sang iya kamatayon. (sspunay)
