Nagalab-ot sa 14,590 ka mga formal kag informal workers sa rehiyon dose ang nakabaton na sang cash assistance sa idalom sang Bayanihan 2 nga may katuyuan nga mahagan-hagan ang epekto sang COVID-19 pandemic sa ila nga pangabuhian.
Sa datos sang Department of Labor and Employment ukon DOLE 12 nagakantidad sa P 73,400,000.00 ang nadisbursed sang ahensya sa idalom sang COVID Adjustment Measures Program (CAMP) kag saTulong Pangkabuhayan sa Ating Disadvantaged/Displaced (TUPAD) workers.
May-angot sini, sa implementasyon sang BAYANIHAN II program yara sa 6,235 private sector workers halin sa 608 unserved establishments ang nahatagan na, samtang sa TUPAD yara sa 8,355 workers halin sa informal sector ang nabuligan.
Nakabaton naman sang one-time Php 5,000.00 financial assistance halin sa DOLE paagi sa CAMP ang mga empleyado sa private sector.
Samtang ang mga kumpanya naman nga nagpatuman sang temporary closures tungod sa COVID-19 pandemic ang gin-advisan nga magparehistro sa reports.dole.gov.ph kag kon kwalipikado ang makaavail sang nasambit nga amelioration program.
Sang Disyembre 1 subong nga tuig yara na sa 608 establishments ang naaprobahan nga CAMP applications sang DOLE 12 kag nadownload na ang bayad paagi sa payment partners nga nakantidad sang P 31,625,000.00.
Samtang yara sa P 41,775,000.00 ang narelease sang ahensya nga bayad para sa mga informal sectors kag vulnerable workers nga ginalakipan sang street/ambulant vendors, tricycle drivers, PWDs, kag self-employed workers nga apektado sang pandemya paagi sa TUPAD program.
Makabaton naman ang mga ini sang P336.00 daily wage sa sulod sang 14-day work period nga ang mga kwalipikado nga mga benepisyaryo ang ginpili sang mga Local Government Units (LGUs).
Ginsiguro naman ni DOLE 12 Regional Director Raymundo Agravante nga mabaton sang tanan nga mga benepisyaryo ang assistance bag-o pa man ang Christmas Day nga target nga marelease ang tanan nga cash aids bag-o ang Disyembre 10.
