Bukidnon – Mukabat matud pa sa 15 ka mga armas ang nakuha sa mga New People’s Army kon NPA human gilusob ang Davao Agricultural Ventures Corporation (DAVCO) nga nahimutang sa Brgy. Merangeran, lungsod sa Quezon, Bukidnon.
Sa interview sa RMN Malaybalay ngadto kang SPO2 Calvin Ray Basao, sa Quezon Municipal Police Station gibutyag niini nga alas 4:30 sa hapon, kagahapon, gilusob sa mga NPA ang mao nga plantasyon.
Matud ni Basao nga kalit nga nisulod sa compound sa DAVCO ang mao nga grupo nga sakay sa usa ka ten wheeler truck.
Mukabat matud pa sa 150 kapin kon kulang ka mga NPA ang nangharas ug gikuha ang mga armas sa mga security guard nga na destino sa mao nga plantasyon.
Tungod sa kadaghan wala matud pa naka-react ang mga guard on duty tungod sa kahadlok.
Sigun ni SPO2 Basao nga gipangsunog usab mga NPA ang mga heavy equipment nga iya sa kompanya.
Samtang sa sulat pamahayag ni Ka Malem Mabini ang tigpamaba sa NPA-NCMR , gipahayag niini nga 15 ka mga armas ang ilang nakuha gikan sa mao nga plantasyon.
