Nakaeksperyensya sang Adverse Event Following Immunization ang yara lamang sa 15 sa 333 ka mga health workers sa lima ka mga referral hospital sa South Cotabato nga nabakunahan sang Sinovac Vaccine sang Lunes nga adlaw, Marso 8, base sa datos sang Integrated Provincial Health Office.
Suno kay Provincial Disease Surveillance Officer Celia Lorenzo ang 15 ang nakabatyag sang sakit sa ulo, pagsuka, nasal congestion kag pagbanog sang parte sang ginbakunahan.
Lunsay naman suno pa mild AEFI ang nabatyagan sang mga ini amo nga gilayon man nga ginpapauli, matapos nga yara na sa maayo nga kondisyon.
Samtang ang nasambit nga mga side effects suno pa ang ginalauman na kon mabakunahan.
Sa subong nagapadayon ang vaccination program sa mga health workers sang lima ka mga referral hospital sa South Cotabato nga matapos sa Marso 14, 2021.
Nahibaluan nga yara sa 1,838 ka mga healthworkers sa nasambit nga mga referral hospital ang mabakunahan.
