General Santos City–Gipresentar ngadto sa hut-ong sa media ang 15 ka mga NPA Surenderee kagahapong adlawa sa Provincial Capitol Sa Sarangani Province.
Una nang misurender ang mga nasangpit ngadto kang Sarangani Governor Steve Chiongbian Solon ug sa Tropa sa 73rd Infantry Battalion sa pagpanguna ni Lt. Col. Marjun Ancao pinaagi na usab sa tabang sa mga opisyal sa Barangay ug mga Tribal Leaders sa Sarangani.
Sumala ni Lt. Col. Ancao nga ang mga nasangpit pulos miyembro sa Guerilla Front 71, far South Mindanao Region. Una na silang nakadawat ug impormasyon nga adunay daghang mga miyembro sa NPA nga buot musurender mao nga sila nakig-alayon sab gilayon sa mga tribal leaders ug mga opisyal sa Barangay kansa nahimong tulay sa pagtahan sa mga nasangpit.
Sama sa nahimong rason sa mga kanhing miyembro sa NPA nga una nang pagsurender tumong sab sa mga nasangpit sa ilang pagtahan mao ang tumang kakapoy ug kalisod nga ilang nasinatian samtang nagtago-tago sa kabukiran ingon man ang kapakyasan sa mga opisyal sa NPA nga mahatag ang ilang saad ngadto sa mga nahisgutan.
Gibutyag usab sa usa ka taas nga opisyal sa NPA kansa apil mitahan sa iyang kaugalingon nga dili na nila masabtan pa ang sistema sa ilang kalihukan mao nga sila mibalik nalang sa sabakan sa gobyerno.
Dili na usab nila makaya ang usig sa ilang konsensya gumikan sa ilang ginahimong pagpangilkil ngadto sa mga negusyante subay na usab sa kamanduan sa mga kadagkuan sa kalihukan.
Sa karon ginaandam na sa Lokal nga panggamhanan sa Sarangani, 73rd IB ug uban pang ahensya sa gobyerno ang mga dukumento aron nga maapil sa programang Comprehensive Local Integration program ang mga nahisgutan.
