Maga pulis del Regional Special Operation Group 9 ya encabesa si Chief Insp. Geronimo Miniosa ya confisca 15 kilo de colorato y otro material para hace bomba durante el buy-bust operation na Arena Blanco enante medio dia.
Maga pulis ya puede tambien aresta con Nasang Pagal Alisan, 38, casao, de Isabela City el quien ta bende conel maga colorato.
Durante el operacion del pulis, ya puede confisca el P500 marked money, monton de blasting caps, detonating cords y 15 saco del ammonium nitrate.
Si Aliasan ya habla conel pulis que tiene lang conele ta man supply el clase de maga material para hace bomba desde na Tawi-Tawi y ele el quien ta hace quilaje-quilaje y ta bende aqui na ciudad.
El maga pulis ta prepara ya maga caso que el planta na corte encontra con Aliasan. – Dan Toribio
